Pedro's Garta

S`alte Moggele

S`alte Moggele hot sich ebbas brocha
Dia Entla dia wäret im Bach fascht vrsoffa
D`Kindla dia plôgat eam Nochbr sin Hund
Dô wo i herkomm, dô sind d`Leit no g`sund

D`Oma dia kratzed im Kies mit dr Näs
Eam Vatter sin Onkel brûchts Hochzitshäs
Dia Gois wo nr g`seah hot, dia isch no jung
Bloß ka se it schwätza, isch taub und isch stumm

Doch des stört ean it, a Gois wo niets sait
Isch riabig und schaffet, mit der geits koin Streit
Bloß hot se it wella, und it weil`r hinkt
Sie will hat koin Ma, wo sauft und wo stinkt

Dr Nochbr fahrt b`soffa am Berg bei de Schumpa
Sei Fahrrad hot Plattfuaß, allbott muß er pumpa
Beim Fluacha dô trielt er a wenig aus dr Gosch
Er hot bloß oin Zah und a Maul wia a Frosch

D`Henna dia hucked z`Nacht vor dr Tür
S`Buale im Hennastall sauft heimlich a Bier
Im Bett bläret s'Mädle, dr Kerle isch weg
Sie hot ean so liab g'het und den schert's an Dreck

Dr Kerle isch froh, weil er isch se los
Er flacket im Wald auf am Brennholzstoß
Sie luaget nôch oba, ihr Bauch wird scho rund
Dô wo i herkomm, dô sind d'Leit no g'sund


Heute back i

Heute back i, morga brau i
Niemand spinnt so guat wia i
Stroh isch alles was i brauch
Und wia i hoiß erfährsch du nie

Ach wia guat, daß koiner woiß
Hon i g'sunga jede Nacht
Um s'Feuer bin i lodernd g'sprunga
Und dann hon i lauthals g'lacht

Dr Boda hon i wütend g'spalta
Mit Schwefel, Blitz und Donnerknall
I hon se mega, hon ihr g'holfa
Ihr Glücksmoment und dann mein Fall

Heute back i, morga brau i
Meine G'schicht kennt jedes Kind
Niemand auf dr Welt ka wissa
Wieviel Kindla bei mir sind


Sie isch it weg

Sie isch it weg,  sie isch bloß it hier
Im Eck von dr Stuba dô stôht mei Klavier
I hon von ihr träumt, i glaub des war letzte Nacht
Do hond d'Engel g'sunga und über uns g'lacht

Sie stôht wia a Fels, drum fallt se it na
Es isch au koin Platz zum falla it da
Sie hält an Spiegel in ihrer Hand
Sie isch wia dr Frühling mit seinem Band

Ihr Leaba sprudelt so wia Wasser im Bach
I bi  wieder môl mit de Henna hellwach
Sie isch des Rad um des es mi dreht
Und wia a Hahn wo frühmorgens scho kräht

Sie isch wia a Kobold, sie spielt Tambourin
Sie hot koine Schuah, aber viel Oigasinn
Sie wirbelt im Krois und sie schlôft it bei Nacht
A Schatz ungehoba, a Gwitter wo kracht

Sie hot a Kloidle a mit Muster drauf
Zu ihr steigsch a steile Treppa nauf
Sie isch it weg, sie isch bloß it hier
Sie spielt mit ihrer Puppa gern auf meinem Klavier...


Zustandsbeschreibung in E - moll

Mei Fahrrad stell i hinter's Haus
Daß mei Vatter jô nix siaht
Oh isch des a grusigs Wetter
Des macht durstig und so miad

Alte Leit hond alte Regla
Dia Junge hond koin Sinn dafür
Guat, daß i in dr Wirtschaft huck
Und heut it dr Vrstand verlier'

D'Kinder spielat in de Gassa
A weißer Spitz bellt hintadrei
I kennt allbot am Buckel scherra
Und koiner hot an Stock dabei

Die Welt isch heut so hoiß und träge
Die Uhr am Kirchturm zeigt die vier
In greller Sonne blinkat Gläser
Du hosch mi gseah, kommsch her zu mir

Wo koin Platz isch wachst nix neues
Wo koiner sät, dô ernteschi t
I  gang nimme auf dr Marktplatz
I  gang hoim und nimm di mit


Liebeslied

Und darum Mei Schätzle isch wia a trocknes Brot
Und wia a Luftballon
So wia a Specht wo Mada suacht
A Paukaschlag, a Gong
A alte Leier und a Hundle
Wo jault und bellt und beißt
Und wia dr Mond und wia dr Wind
Wo an de Wolka reißt

Mei Schätzle isch wia a Fläschle Wi
Isch trocka, rot und reif
Isch voll so wia St. Niklaus'Sack
Und i a bizle steif
A Pulverfass, voll Tat und Wort
Loßt sich auf alles ei
Isch liab und voller Ungeduld
Klopft oinr, derf er rei

Sie isch so wia an Kuchaofa
Und wia dr Brôta drauf
Sie loset und dann küsst se mi
Fahrt mir am Buckel rauf
Dô halt i still und luag se a
Mei Haus, mei Dach, und nia
Isch sie so wia an trockener Brunna
Und darum mag i sie


Dr Saft

Oh du bisch mei Mädle, oh komm doch heit Nacht môl zu mir
Und wenn'd wirklich kommsch zeig i dir
S'zaubra mit meim Zauberstab
I  ka zaubra z' Nacht wenn i mag
So ebbes hosch du no nia g'seah
Bei mir bisch halt nia no it gwea

Komm sei doch mei Mädle, oh bleib doch heit Nacht môl bei mir
Warum gôhsch du immer zu dir?
Warum kommsch du nia zu mir rei?
Es isch doch gar nix dabei
Dia Eule haust doch unter'm Dach
Dia hört nix und wird g'wiß it wach

Du saisch jeden Abend die Leaba sei jeden Dag neu
Und du wäresch mir sicher it treu
Und d'Liabe sei wia an Donnerschlag
Verklunga am andera Dag
Was bleibt sei a Hohlraum, schlimmer noch:
Enttäuschung, mei Wuat und a Loch

Im Traum, oh mei Mädle, dô hot bei mir alls so schee g´stimmt
Wia ka's sei, daß alls an andra Weg nimmt?
Komm bleib doch heit Nacht, i due dr nix
Du störrische grätige Bix
S'Leaba isch doch bloß a Spiel
Wer g'winnt und verliert zählt it viel

Geascht hon i di troffa, ihr waret so eng Hand in Hand
Warum drucksch mi so an dr Rand?
Bloß a kloiner und schmerzloser Biss
Dr Saft, wo i so vermiss
Du wäresch so still in meim Arm
Dei  Körper, der bleibt lang no warm...


Warmes Wasser

Ihr Rock hot Loch, im Loch huckt a Maus
Im Körble isch Holz, doch koi Holz vor'm Haus

Beim Esstisch dô hangat a alts Kruzfix
Dr Hafa isch leer, im Teller isch nix

Sie will im warma Wasser flacka, im Fluss sei, still und klar
Dô wett se endlos treiba kenna so wia's am Afang war

Sie hebt sich am Stuhl, a Blüamle im März
S'Liab hon isch blos an uralter Scherz

Dia Ampel auf rot, im Bahnhof koi Licht
Dr  Zuag auf dr Strecke, a Kruag wo zerbricht

Sie will im warma Wasser flacka, dia Welt isch sonderbar
Sie wett do endlos treiba kenna so wia's im Ursprung war

Sie will it z'ruck und will it weg, es isch koi Halt in Sicht
Und immer wenn se d 'Auga schliaßt dann siaht se des Gesicht


Marie

Dr Pförtner hot ôbends sei Haustür vrschlossa
Marie hockt am Schreibtisch, sie gôht heit it mit
Er nimmt sein Huat vom obersta Hôka,
Steigt nab in dr Keller mit sicherem Schritt

Viel hot se heit g'schaffet und vieles au sei long
Sie guckt auf dr Boda, auf d'Wand, auf s'Papier
D'Kellertür quietscht und sie macht a Flasch Wei auf
Verwirrt von dr Stille, dr Stille in ihr.

Dr Pförtner gôht hoimwärts, er luagat nôch oba
Und plötzlich bemerkt er im Fenster a Licht
Sie stôht auf de Diela und trinkt aus dr Flascha
Sie schaut in dr Hof und hört it was er spricht

Ihr Lächeln isch eisig, sie schminkt sich im Spiegel
Beginn und Erfüllung in oim Augablick
Er schlurft über d'Strôßa und holt Zigaretta
Sie friert und ergibt sich ganz ihrem Geschick



Morga Nacht

Oh morga Nacht
Kommsch du zu mir
Wenn blos dr Mond no wacht
Oh morga Nacht
Wenn all's vergessa isch

Oh morga Nacht
Bisch du it bloß no mei Erinnerung
Blos no a nettes Liad
Des mit mir kommt
Und mit mir ziagt

Mecht di so gern küssen
Dei Herz des klopft so laut
I bi so gern bei dir g'leaga
Oh bisch du morga au mei Braut?

Oh morga Nacht
Kommsch du zu mir
Wenn bloß dr Mond no wacht
Oh morga Nacht
Hosch du wieder für eis zwoi a Bettle g'macht?



Mach's guat, mei Maria

Mach's guat, mei Maria, dr Zuag isch längst weg
Bandita hond ean g'stohla, jetzt steckt er im Dreck
Am Morga isch Kirch gsi und s'Fescht um halb drei
Jetzt stand i alloi dô, s'isch alles vorbei

Mach's guat, mei Maria, s'Feld isch jetzt kahl
Dr  Müller mahlt s'Brotmehl, acht Sach an dr Zahl
Z' Nacht schlagt gern dr Blitz in a Wasserrad nei
Am Morga hosch g'lachet, des ka doch it sei

Mach's guat, mei Maria, es wird alles neu
Im Herbst duat mr ernta, trennt Woiza und Spreu
Dr Blitz suacht sich liabr sein Weag in am Hag
Und d'Wecka sind fertig am andera Dag


Mach's guat, mei Maria, I muaß wieder hoim
I fliag mit de Wolka wenn I von dir träum
Dr  Moischtr dô oba hot alles im Blick
Und in a paar Däg dô bin i wieder z'rück



Sirenagesang

Egal, wo du stôhsch,
Du stôsch auf 'm Grat
Voll Hoffnung hosch g 'sät
A rollendes Rad
Jetzt drehsch di im Krois
A Ewigkeit lang
Dr Wind treibt vo weither
Sirenagesang

Oh geascht ' isch halt alles
Ganz anders no gwea
Und jetzt denksch an morga
Hosch alles scho gseah
Di grusets,  du drucksch di
Ganz kloi an dr Rand
Du stôhsch vor dr Mauer
Koi Loch in dr Wand

Du hoffsch auf a Zoicha
An Hinweis,  a Licht
Vertrau auf di selber
Begreifsch du des nicht
Dr Herrgott der hot di
Auf oigne Fiaß g'stellt
Hot dir alles geaba
Was'd  brauchsch auf dr Welt

Er isch immer bei dir
Er gôht immer mit
Er loßt di it falla
Und hält mit dir Schritt
Heb doch môl dr Kopf hoch
Was machsch dr's so schwer
Die Welt isch unendlich
Was willsch denn no mehr?


Dr Pfau schlägt sei Rad

Es wird scho glei dunkel
Es wir scho glei Nacht
I hon in meim Kuchaherd
A Feir entfacht
Aus heiterem Himmel
Reagnets auf mi
I find it zum Hafa
Dr Leuchtturm isch hie

Leis hör i dr Donner
A  Gwitter ziat auf
A Trompeter bläst irgendwo
An zittriga Lauf
I hon nia an Schlüssel braucht
Für deine Tür
Jetzt isch se verschlossa
Du bisch nimme hier

Dia  Zeit dehnt sich aus
Bis zur Unendlichkeit
Wia gern hon i glaubt
Es gäb Sicherheit
Und manchmol isch' s besser
Mr pocht it auf s'Recht
A jeder will Recht hon
Dr Herr und dr Knecht

Jetzt isch es längst dunkel
Es isch scho lang Nacht
I  hon in dr Kucha
S'Licht ausgemacht
I  bi umanand
Heute hier, morga dort
Dr Pfau schlägt sei Rad
Oh, warum bisch du fort?


Pedro's Garta

Oh i wach auf am Morga und mei Kopf flackat bei de Fiaß
Zwoi Fraua in dr Küche schnipplet Kohl und and'res Gmias
Und hinter Pedro's Garta isch a Feld mit rotem Mohn
Des oinzigschte, was i no wois, daß i in Pfärrich wohn.

Häusr sind wia bunte Bolla, s'Schwimmbad des isch leer
Mit lange schwarze Hôhr stôht oinr am Rand und atmet schwer
Dann zupft er leicht an meine Hosa und gibt mir glei sein Lohn
I ka nix saga außer des, daß i in Pfärrich wohn

Dia Alte hot a Segelohr und Lucka in de Zäh'
Der mit dr Flöte lächelt dumm, er find sein Ton it meh'
I säg eam kurz sei Holzbein weg, i kriags it besser hin
Was i eam dann no saga ka, daß i aus Pfärrich bin

Ramon sticht langsam durch die Nacht, dia Bühne bleibt heut leer
A nasser Hund schlurft aus em Eck, s'Wach sei fallt eam schwer
Scho stôht er vor mir, frôgt mi bloß - im Bart an dicka Joint-
Daß i doch der aus Pfärrich sei, zumindest hon i's gmoint

A Geiger stôht auf einem Bein, a Kindle lacht mi a
I bi mr plötzlich nimme sicher ob i au lacha ka
Scho dreht's mi wia im Karussell, dr König hot an Tron
Der Zirkusclown der wois des scho, daß i in Pfärrich wohn'

I grab mi ei ganz tiaf im Berg, dô wohnt dr liebe Gott
A Riese mit am kurza Fuaß schreit daß es g'schlaga hot
Kaum will i frôga was er moint versetzt er mir an Tritt
Gibt mir die Zügel, fleht mi a "Nimm mi noch Pfärrich mit"

Dr Bürgermeister fallt ins Taxi und biatet Schnäpsla a
Er will no bis zum Kirchturm rauf, frôgt, ob i laufa ka
I denk "wieso" , er grunzt bestimmt "beim Steiga wird mr fromm"
I glaub eam nix und sag eam bloß daß i aus Pfärrich komm

Die Brotmarie frôgt fassungslos "wer wois was morga isch?
I hon an kloina Bua drhoim, koi Essa auf am Disch"
I schenk ihr glei an Sack voll Bohna, des g'hert zum guata Ton
Und plötzlich wois is selber it ob i in Pfärrich wohn'


Dr Kaffee schmeckt nôch Wasser und dr Taube auf meim Fuaß
Der bind i glei an Zettel na und schick meim Schatz an Gruaß
Dr Esel an dr Haltestell' der schleppt mei Notration
Des klappt weil jeder Esel wois, daß i in Pfärrich wohn'

Dr Zwerg wo unterm Kuhhuat steckt, der faßt mi um dr Bauch
Dann schenkt er mir sein Kontrabass, sait "bei uns isch des Brauch"
Dia Frau dia hundert Töne hot suacht dringend Munition
"dia brauch i" sait se, "Falls i môl bei dir in Pfärrich wohn'"

I suach mein Kopf, s'isch aussichtslos, und wo sind meine Schuah?
Am Bettler in dr Seitastrôß gib i no s'Hemd dazua
Und barfuaß lauf i atemlos schräg nab zur Poststation:
Zum Glück vrstôht dr Kutscher glei, daß i in Pfärrich wohn'