A Landschaft
Dr Fuchs isch im Stall
Dr Fuchs isch im Stall, dr Fuchs isch im Stall
Der packet die kloine Bibele all
Oh Mama, dr Fuchs isch a nixiger Hund
Der frißt sich sein Ranza bei îs kugelrund
S`Wîb isch drhoi, s'Wîb isch drhoi,
Dia hot in dr Galle an riesiga Stoi
Dia hot nix zum dua, dia luaget alls a
Isch grätig und goschat und jeder kommt dra
Fünf Kindla dia spielat im Mist vor em Haus
Dia grabet an Tunnel und kommet it raus
Dr Opa der haut auf a Bix daß es kracht
Dr Fuchs der schleicht hoi mit dr Gans und er lacht
S'Brennholz des flackat im Wald umanand
Dr Wilderer hockt hinter am Jägerstand
Doch wenn oinr steala will ohne Not
Dann kenna mr koi Gnade, dann schlaga mr'n tot
Dr Fuchs isch im Stall, dr Hägl isch los
S'Mädle glotzt bled und dr Bua scheißt in'd Hos
Dr Butza der huckt und i sag mit Bedacht
Bevor i jetzt hoimgang: "Dankschee und guat nacht"
Neuschnee
Heut Nacht isch Neuschnee g'falla
Sìsch doch no gar koi Zeit
D'Kinder werfat Balla,
Dr Weg isch ganz verschneit
Mei Haus des hot koin Giebel
Es isch scho ziemlich alt
Zerbrocha sind dia Riegel
Im Stüble isch es kalt
Oh Schätzle, bleib heut bei mir
Weil i so elend bin
Nimm mi in Deine Arme
So gôht dr Winter hin…
A Feir am Ôbed
Jô, i môg a Feir am Ôbed
Wenn a Katz schnurrt auf dr Bank
An warma Kraga an meim Mantel
A rostig's G'wehr unter meim Schrank
Vor'm Fenster ziaget Nebelschwada
Silbrig-seida über's Land
I sitz locker auf am Bänkle
Zuviel Hektik macht mi krank
Und dia Sorga vo heit morga
Fallat lautlos ab vo Dir
Gang nôch oba, luag in'Spiegelm,
Lôß Dei Häser au glei hier
I sitz dô und schreib des Liadle
Was ui viel zu selta tu -
Im Ofa heizt a lustigs Feuer
I küss Di, mach die Türe zu...
Wasser Im Bach
Wasser im Bach
I bi mit de Henna wach
D'Zeit stôht it still
I ka dua was i will
D'Heisr so bunt
Luaget vom Bergle und
Dr Kaffee am Tisch
Isch nimme ganz frisch
Komm nimm mi in dr Arm
Z'nacht isch es it so warm
I kauf eis im Morgarot
Beim Bäcker a Brot
Dia Welt isch so kloi
Überrall bisch drhoi
Alle an Bord
Vrstandet koi Wort
A Vögele singt
Und in dr Ferne klingt
Glockaschlag hell
Und Hundegebell
Komm nimm mi in dr Arm
Z'nacht isch es it so warm
I kauf eis im Morgarot
Beim Bäcker a Brot
Äpfel leasa
Äpfel leasa, Äpfel leasa
Du bisch mir an alter Beasa
Loß doch besser S'Feaga si
Andernfalls zerbrich i di
Äpfel leasa, Äpfel leasa
Du bisch mir an krummer Beasa
Stell mi di an'Steffel na
Gôht's it lang, no keits di ra
Äpfel leasa, Äpfel leasa
Du bisch mir an dummer Beasa
Warum kasch Du it alloi
Saubermacha, braucht's dô zwoi?
Äpfel leasa, Äpfel leasa
Du bisch mir an reater Beasa
Tanz it auf mei'm Buckel rum
Mach dr böse Nochbr krumm...
I moin immer
I moin immer dô stôht oinr
Und den isch dô doch koinr
I moin immer es wär ebbes
Und wieder isch nix
S'isch unendlich unendlich endlich
Und moischtens unkenntlich
Ka's dreha und wenda
Wia a rostige Bix
S'isch kloi wia a Pflänzle
Eam Buele sei Schwänzle
Wia zwoi dunkle Auga
Und wia a Komet
I moin allmôl lacht se
Z'nacht, dann verwacht se
Dann luaget se um sich
Und frôgt, wia's mr geht
So denk i, dann träum i:
Am Morga isch all's hie
Moin immer, es wär ebbes
Und wieder isch nix
S'isch groß so wia Heuballa
Und stumpf so wia Hundskralla
Ka's dreha und wenda
Wia a rostige Bix
Eam Opa seine Henna
Eam Opa seine Henna, dia dappet durch dr Schnee
Sie hockt am warma Ofa und trinkt an Milchkaffee
Vom Vordach hangat Zapfa, dia sind bedrohlich lang
Dr Bua huckt auf am Schlitta, dô links am steila Hang
Z'mol hot's ean runterg'haua, dr Bach empfangt ean kalt
Scho hot er nasse Hosa, bevor er's no reat schnallt
Dr Opa, der hot's gsea und schlupft in seine Schua,
Dann lauft er schnell zum Bach nab und holt dr nasse Bua
Dia Henna, dia hond's wichtig, dia picket altes Brot
Am Vordach bricht dr Zapfa, dr Schnee verfärbt sich rot
Sie luaget aus'm Fenster, Sie hot a Katz im Schoß
Der sait se fascht vrdriaßlich: "Heut isch au gar nix los"
D'Stôra sind weg
Mei Schwester schält Äpfel, dr Kopf an dr Wand
Sie schwätzt vor sich na, schwätzt vom klara Vrstand
S'Gschirr in dr Kucha, des stôht kreuz und quer
Sie mag gar it aufstong, des fallt ihr so schwer
Oh Schätzele, Mädele, d'Stôra sind weg
Oh, Schätzele, Mädele, s'Boot hot a Leck
Oh, Schätzele, Mädle im Gärtle hot's Stoi
Oh Schätzele, Mädle, loß mi it alloi
Mei Bruadr isch ledig, doch des stört ean it
D'Mutter und d'Oma, dia nemmat ean mit
Beim laufa, dô klappt er sei Gosch auf und zua
Beim schlôfa und saufa dô will er sei Ruah
Oh Schätzele, Mädele, d'Stôra sind weg...
Eam Gette sei Fraule dia bindet mr a
Damit ihr dr Rollstuhl it abhaua ka
Mr schiabt se am liabsta ins Gärtle vor'm Haus
Dô kommt se ins Träuma und fast nimme raus
Oh Schätzele, Mädele, d'Stôra sind weg...
A toter Hägl stinkt links hinter'm Stall
Daneba hot's Kinder, dia spielat dô Ball
Dr Gette putzt Fässer, er isch ganz alloi
Er stôht auf dr Loitr, weil sonscht isch er z'kloi
Oh Schätzele, Mädele, d'Stôra sind weg....
Mei Kopf isch ganz hohl, dr Ton, der isch weg
Es prallt alles ab, es hot doch koin Zweck
I zünd in dr Kirch a klois Licht für di a
Kennt sei, daß des hilft und Du findesch an Ma...
Oh Schätzele, Mädele, d'Stôra sind weg...
A Ma im Haus
An Ma hot se scho im Haus, bloß der huckt im Goisastall
Im Dachkerner Fleadermeis, a Spinne im freia Fall
Und Sie isch a Muhhagel, a Kugel im Lauf
Im Lada geits Dosawurscht uim Ausverkauf
Dr Bergkäs isch räsig und vom letzta Jôhr
Dr Wind blôst vo Osta und d'Kiah stellat d'Hôhr
Und Sie stôht am Fenster und sait vor sich na:
"Im Stall isch a Gois, isch a Gois denn mei Ma?"
Dr Waga hot Gitter, dia holet oin ab
D'Äpfel dia fallet, dr Heiland kommt rab
Der macht alles besser, des glaubet se gern
Insgeheim wois es jeder: Der Dag isch no fern
D'Nochbre sott Butter hon, im Bett schlôft a Katz
D'Kinder dia trialet und brüchtet an Latz
Sie schlôft auf'm Sofa und schnarchelet leis
Dia Wand hinterm Ofa isch drecket und hoiß
Weit dussa dô stapft oinr mühsam bergauf
Er nimmt an Schluck Wasser und s'Schicksal sein Lauf
Sie luaget auf d'Uhr und sie fährt sich durchs Hôhr
Dann sait se: "S'isch Zeit" und: "Bis in a paar Jôhr"
Meine Stiefel
Du willsch bloß no an s'Morga denka
Die Glück verreißt's wia Schreibpapier
I will Dir was zum Abschied schenka
Vielleicht a Lanze für's Turnier
Vielleicht an Mantel, falls dr kalt wird
Mit dem ertragsch's dô dussa leicht
Und dr Fluß wo'd überqueresch
Find'sch am morga blos no seicht
I wois, Du musch alloinigs fahra
Vielleicht kommsch nimme meh zurück
Koim Fährmann derfsch koi Geld it zahla
Auf des was kommt richtesch Dein Blick
I hoiff daß Du dô ebbes findesch
Was altes in dr neua Welt
So ebbes, was Di no verbindet
Und Di a wenig am Alta hält
Mr sait, dia Zeit heilt alle Wunda
So wia d'Sonn wo Knocha bleicht
Und was gestern no a Kampf war
Hosch heit vo ganz alloi erreicht
Am Besta schenk dr meine Stiefel
Dia traget Di auf Schritt und Tritt
Und s ka sei, auf oimol merksch Du
I lauf in dene Stiefel mit...
A Landschaft
I spiel und sing, i bi a Landschaft
I bi glockahell und wach
Bi überall und i bi nirgends
I bi a Feld, i bi a Bach
UI bi a Wand'rer und dr Opa
Meislestill und mittadrin
Bi a Landschaft, bi a Wäldle,
Beweglich, weil i vieles bin
I bi dei Trepple, bi dei Musik,
Bi a Landschaft, nasses Gras
Mi freits wenn oinr riabig loset
Des isch viel, des isch doch was
I bi die Karra, und die Loitr
Bi dr harsche Schnee am Dach
I lach und sing, i bi a Landschaft
Und mittles in dr Nacht no wach
A Haus wo scho brennt
A Haus wo scho brennt, a Kindle wo schreit
A g'schorener Goisbock und Mutter hot koi Zeit
Dr Vatter beim Jaga, sei Gois isch im Wald
Dô hört er a Liadle wo wieder verhallt
Am Brunna sind Bluama, dr Birrabom bleut
Und alls voller Farba und überall Leut'
Drhoi spielt a Musik, zum Dach steigt se nauf
Und alle sind komma und wartat darauf
Daß ebbes passiert, weil ebbes it stimmt
Weil in dr Kucha an Wasserhahn rinnt
Dr Himmel wird dunkel, es gôht scho auf d'Nacht
Dr Herrgott loßt's reagna, dr Herrgott der wacht
Und jeder will danza, so guat er halt ka
Mr freut sich und fangt glei vo vorn wieder a
Dr Brunna isch trocka, dr Goisbock isch weg
Und alls was dô gwea isch a kohlender Fleck....
Geographie
S'Laub färbt sich bunt, Erntezeit isch vorbei
I stand auf am Weag, sieh vor mir dia zwoi
Hundla wo spielat so voll Harmonie
I vermiss Opas Hundla und Di
A Teller liagt umkehrt auf am Wachstuach am Tisch
Dr Most im Kanister isch nimme ganz frisch
D'Gluat auf am Boda isch voller Magie
I vermiss Opas Kucha und Di
Und zwischa de Bluama dô graset dr Franz
Vor dem isch nix sicher, koi Blüamle bleibt ganz
Der gôht mit de Leut mit für Kost und Logis
I vermiss Opas Goisbock und Di
I stand auf am Weag und i folg' eam a Stuck
Dô obr dr Stern, i ka nimme z'ruck
Dia Leit aus am Morgaland hot er wohl g'führt
Des Licht vo dô oba, des hot se berührt
Im Hausgang dô liagt auf dr G'friere dr Huat
Und drin a Papierle mit Datum und guat
Siaht mr s'G'sicht auf dr Fotografie
I vermiss Opas Lacha und Di
S'Laub färbt sich bunt, Erntezeit isch vorbei
I stand auf am Weag und dunkel wird's glei
Dr Opa wois it viel von Geografie
Den mag i, und i mag di!
Schlupf in Dei Schuah
I wois it wer Du bisch und wo na Du gôhsch
I wois blois des, daß Du jetzt dôhanna stôhsch
I wois it was Du g'macht hosch an diesem Ort
Wois blos des oine, Du bisch lang scho fort
He Du, schlupf in dei' Schuah
He Du, lauf scho môl zua
Hosch Du was g'schaffat und hôt Di des g'freut
Hond se di mega, warsch guat zua de Leit
Oder hot's Di halt irgendwenn butzt
Kommsch it nôch oba, s'hot alles nix g'nutzt
Du stôhsch am Bahnhof, so um Mitternacht
Du kasch it schlôfa, dei Zuag gôht um acht
Komm, loß alls falla, alls was Di bedrängt
S'isch immer a Freund dô wo hilft und Di fängt
A Holzkischta
Oh i bi an'r Stell' wo a fremder Ma liagt
Und still stand i vor seinem Grab
Z'môl flüstert's ganz leis und i hör daß er sagt:
"Wia schee mit de Wolka mr fliagt"
"Was juckt's mi ob's schneit oder ob Donner grollt,
Sìsch glîch, was au immer passiert
I schlôf richtig gern in dr Holzkischta drin
Derf endlich der sei, der i bin.
Dr Moistr dô oba hot g'wißt, daß I komm
Er hot nôch mir g'ruafa bei nacht
Und glaub mr, dr Abschied war leicht und dr Weag
War hell und wia blos für mi g'macht
Oh Schätzle, i bitt di, sollsch it traurig sei
Nix ka mi trenna vo dir
Dia Hand, wo mi g'führt hot woiß au um eis zwoi
Dei Liebe, dia spür i au hier"
|
