Aber nix

Aber nix...

Oh Du kasch a Wandrer sei mit Feadra auf Deim Huat
Du bisch vielleicht an alter Ma und stochersch in dr Gluat
Direktor oder Zirkusclown, trinksch Schnäpsla oder Bier
A Frau im schönsta Obadkloid, a Künstler am Klavier

(Ref) Dô oba fliagt dr Klapperstorch, im Keller zählsch dei Geld
Aber nix kasch mit Dir nemma, nix vo dera große Welt
D'Engel singat Hosianna wenn alls auseinanderfällt
Nix vo Dir kasch mit Dir nemma wenn am Turm dia Glocke schellt

Oh Du kasch a Landwirt sei mit hundertzwanzig Kiah
Schlôfsch bei dr Brucka auf am Strohsack und hosch nix azumziah
Du bisch vielleicht a Banker, Händler, a Zimmerma am Dach
A Koch, a Dieb, a Fischverkäufer, a Angler an am Bach

Du bisch vielleicht dr Grundschullehrer, schaffsch bei dr Polizei
Bisch Schlosser, Mauer, Kellermoischtr und Heisr hosch glei zwoi
Bisch krank, verliabt, im siebta Himmel, Computerspezialist
Bisch Autohändler, Richter, Töpfer, a Katz wo aus am Teller frisst

Oh Du kasch a Banker sei, a Scheich, a Präsident
A Älpler oder reicher Ma, a Knecht wo koinr kennt
B'suachsch grad Jesus und Maria, der ihr Kindle schlôft im Heu
Bisch dr Wirt und hosch an Esel, und koinr bisch Du treu...


Mei Boot hot a Leck

Was hond Ihr mit mir vor, was hond Ihr für an Plan
I wois it wo na und was fang i an
I häng in dr Luft, dr Boda isch weg
Wia isch's so weit komma? Mei Boot hot a Leck
 
Was hond Ihr mit mir vor, I loß mi auf Euch ei
War so satt und bequem und nimme dabei
Hon immer dia Aussicht g'liabt oba an Deck
Wia isch's so weit komma? Mei Boot hot a Leck
 
Was hond Ihr mit mir vor, bin I no mit im Spiel
Rien ne va plus, wenn's gilt, dann gilt viel
I ka nimme fliaga, sitz schwer in am Eck
Wia isch's so weit komma? Mei Boot hot a Leck
 
Was hond Ihr mit mir vor, was soll i bloß dua
Du bisch nimme bei mir, des loßt mr koi Ruah
I bi wia vernagelt, I komm it vom Fleck
Wia isch's so weit komma? Mei Boot hot a Leck


Deine Schuah

Deine Schuah fahr I spaziera
Des isch alls was I no hon
Wo na bisch heut morga ganga
Fisch mit dem Akkordeon?

Wo Du warsch isch jetzt a Schlachtfeld
Trümmer einer and'ren Zeit
Du bisch ins weite Meer naus g'schwomma
Alles isch Vergangaheit

I loß all's flacka, alles standa
I muß Di dringend wiederseh'n
Ka it ruhig sei, muaß Di finda
Über Berg und Brücka geh'n...


Leere Tasse

Füll mir meine leere Tasse, füll sie bis zum Rand
Lôß mi it dô dussa standa, nimm mi bei dr Hand
I brauch hier koin Unterhändler, Pfarrer mit am Buach
Liag wach dia ganze Nacht im Bett und schreib mei Gnadagsuach
I brauch bloß Di, nur Di, i brauch bloß Di
 
Füll mir meine leere Tasse, füll sie bis zum Rand
Lôß mi it dô dussa standa, nimm mi bei dr Hand
I brauch hier koin Landvogt mit am edla schwarza Pferd
I brauch koi Haus und it amol an neua Kuchaherd
I brauch bloß Di, nur Di, i brauch bloß Di
 
Füll mir meine leere Tasse, füll sie bis zum Rand
Lôß mi it dô dussa standa, nimm mi bei dr Hand
I brauch koine neue Kloider und it des große Geld
I liab Di, dabei merk i scho wia d' Decke auf mi fällt
I liab bloß Di, bloß Di, I liab bloß Di
 
Füll mir meine leere Tasse, füll sie bis zum Rand
Lôß mi it dô dussa standa, nimm mi bei dr Hand
I war heit it dô für Di, Du hättesch mi so braucht
I war so wia kalte Asche, koin Vulkan wo raucht....
I liab bloß Di, bloß Di, I liab bloß Di


Fische

Am Strand flacket Boote, bei de Felsa so hoch
Suachet zwoi Kletterer im Himmel des Loch
I hon mi so sicher g'fühlt, beschützt und bewacht
I hon immerzua bloß an Fische gedacht

A Vogel im Sturzflug, von Wella verschluckt
A Nest kommt in Sicht, an dr Felsa nadruckt
Mei Nest isch bei Dir, Du hosch es mir g'macht
I hon immerzua bloß an Fische gedacht

I brauch koine Worte, dia bringet mi um
S'Meer isch mei Wiege und Fische sind stumm
Hör nia meh Dei Klaga, verlorene Schlacht,
I hon immerzua bloß an Fische gedacht

Dia Brandung isch hoch, sie rollt hin und her
Z'môl waret se dô, dia Fische im Meer
A glitzernder Schwarm in schillernder Pracht
Erhaba und schee wia a Liebesnacht....


Zwoi Mahlstoi

Schnaps isch Schnaps und Dienst isch Dienst, dr Wind blôst d'Kerza aus
A Wible in am rota Rock hinkt langsam zruck nôch Haus
Am Marktplatz isch es meislestill, vorm Grabstoi huckt a Katz
Im Stoppelfeld dô scherrat Kräha, im Rinnstoi rennt a Ratz
 
A alter Schlepper parkt im Hohlweg, es isch so weiß und still
Dr Bua hockt auf am morscha Baumstamm und woiß it was er will
Dr Moischtr, der schreit immer :"Lauf zua", dr Zöllner, der schreit: "Halt!"
Dr Richter, der isch immer grätig, eam Burgherr isch es kalt
 
Vom Nochbr, dô kommt alldag obends dr dumme Knecht bei mir vorbei
Der hot Angst vor Blitz und Donner, steckt dr Kopf verschreckt ins Heu
Mi druckat zwoi Mahlstoi, brûch grad mei ganze Kraft
I loß mi doch it pressa so wia Apfelsaft
 
Der Büttel im Amt, es gôht nix vora, schnell greift er in a Gurkafasss
Dr Pfarrer hot dr Blitzschlag troffa und Maria hinter Glas
Dia hot an Sprung und Spinnaweaba hangat in dr Ecka fest
Schwarz vom Ruaß im Herrgottswinkel isch au des alte Schwalbanest
 
Dr Opa wartet auf sei Weible, dia gôht heit in am rota Rock
Dr Bua, der luaget nôch deam Schlepper, dr Büttel braucht an Sündabock
In dicke Flocka spuckts dr Schnee rab, fast gnädig deckt er alles zua
I druck dr Huat ganz fest ins Gsicht nab, i hon no was zum dua...


Ecuador Waltz # 2

Komm, bleib bei mir, alle sind scho fort
Verklunga sind die Melodien, das letzte Wort
Und die Frau mit dem Huat hot die Karta g'mischt
Und alles des was grad do galt, wird weggewischt
Du lachsch mi a, ziasch an meine Schuah
Und die Band spielt den Ecuador Waltz dazua
Und die Frau mit dem Huat hot dia Karta g'mischt
Und alles des was grad no galt, wird weggewischt.
 
Komm, bleib bei mir, dr Clown isch längst drhoim
Dr Vorhang fällt, dr Mond geht auf, i kenn hier koin
Und die Frau mit dem Huat teilt die Karta aus
Am Boda liegt, scho ganz verwelkt, a Bluamastrauß
Tanz heute Nacht ohne Rast und Ruah
Und die Band spielt den Ecuador Waltz dazua
Und die Frau mit dem Huat teilt die Karta aus
Am Boda liegt, scho ganz verwelkt, a Bluamastrauß
 
Komm, bleib bei mir, wohin willsch Du geh'n
Was morga isch, soll morga sein und morga g'scheh'n
Und die Frau mit dem Huat steckt die Karten ein
Dr Saal isch leer, die Lichter aus, wir sind allein
I hon heit nacht a Rendevouz
Und die Band spielt den Ecuador Waltz dazua
Und die Frau mit dem Huat steckt die Karta ein
Dr Saal isch leer, die Lichter aus, wir sind allein....


Ihr standat dô rum

Ihr standat dô rum und glotzat Euch a
Als wär oinr komma aus Golgatha

Ihr seid so schee bunt, macht des für Euch Sinn
Sich bunt azumziah und it wissa, wohin

Ihr seid jung, Ihr seid alt und in Agonie
Ihr wartet auf's Morga voll Melancholie

Wart Ihr denn au so wia I neugebor'n
Hond dr Hauptgewinn zoga und wieder verlor'n

Was gôht denn dô vor, s' isch bloß so a Spiel
S'gôht immer weiter, es wird nie zuviel

Was machat Ihr dô, wo luaget Ihr na
Es kommt koinr wieder vo Golgatha


Feine Herra

I hon saumäßig g'frora bei Nacht in dem Bus
Und Sie hot mi g'wärmt und mir waret im Fluß
I denk oft an Sie, im Herbst isch es gwea
Jetzt isch all's verneablet, ka Sie nimme seah
 
Hör immer den Ruf, I muß weiter zieh'n
I gang mit dem Clown mit dem Tambourin
Komm, b'stell Ihr an Gruaß, Sie kommt gega drei
Dr Stoi isch im rolla, s'isch aus und vorbei
 
I Seh Sie no schaukla bei de Erla am Bach
I spür diesen Zauber in mir tausendfach
Ka Sie it vergessa, Sie wohnt tief in mir
Dr Wind hot gedreht, I bi nimme bei Ihr
 
Pass guat auf Sie auf, viel besser als I
Und sei Ihr dr Ma wo I it g'weasa bi
Dia feina Herra sind scho an dr Tür
Dia derfsch jô it reilong, Sie ka nix dafür.....
 
Pass guat auf Sie auf, viel besser als I
Und sei Ihr dr Ma wo I it g'weasa bi
Hör immer den Ruf, I muß weiter zieh'n
I gang mit dem Clown mit dem Tambourin.....


Mommele

Mommele, Mommele
Mach Dir koine Sorga um Dei Kindele
Mommele, Mommele
Dô dussa gôht a warmer Wind
Mommele, Mommele,
Dr Schnee isch weg, scho siaht mr s'erschte Blümele
Mommele, Mommele
Dei Ohr isch taub, Dei Herz isch blind

I komm mit rei und bleib heut nacht bei Dir
Doch wenn es taget muß i weg vo hier
Halt mi it fest, oh bitte loß mi los
Was kloi war, macht dr Sommer groß

Mommele, Mommele
Mach Dir koine Sorga um Dei Kindele
Mommele, Mommele
Dô dussa gôht a warmer Wind
Mommele, Mommele
Suach it in dr Stuba nôch Deim Taschatuach
Mommele, Mommele
A Blüte geits wo Knospa sind

Dein Koffer stell I wieder vor die Tür
Den brauch I it, er g'hört ja au it mir
Dr warme Wind streicht sanft um mei Gesicht
Den spürsch Du in dr Stuba nicht...


A dreckete Zinkwanna

A dreckete Zinkwanna, a neabliger Mond
A klappriger Waga wo s’richta it lohnt
A Gfriere wo iset, im Kialschrank sind Meis
D'Kircha isch gschlossa und d'Kinder hond Leis
 
Dr Weihnachtsbaum nôdlet und d'Messer sind stumpf
Dr Neabl in Fetza, an Kuahfuaß im Sumpf
Drei greichte Forella hond d'Schwänz in dr Luft
Und mein guater Wille isch wieder verpufft
 
Vom Obstbaum hauts Äscht rab und s'Gras isch it gmäht
Dr Acker isch hergricht und koiner hot gsät
Dr Moscht isch scho besser gsi, mir manglat an Schuah
Dr Hund hot ean gstohla, des loßt mr koi Ruah
 
D'Hasa dia frieret und findet it hoi
Dr Fuchs isch im Hennastall selta alloi
Dr Opa kocht Knocha, d'Oma trinkt Tee
D'Katza hond Junge, dr Jäger a Reh
 
Dr Waschkessel ruaßet und d'Kucha isch kalt
Im Ofa sind Stoiner und d'Häfa sind alt
D'Fenster sind brocha und koiner drhoi
Eam Buele sei Teddy, der isch halt no kloi


Speck isch in dr Pfann

Speck isch in dr Pfann und mei Geld bei dr Bank
Dr Opa isch weg und mei Mutter isch krank
Wo warsch Du heit morga zwischa sechs und halb neun?
Du kasch doch it ganga, i kenn hier doch koin'

Dr Gaukler beim Marktplatz hot alles dabei
Isch Richter und Töpfer und voll Zauberei
Du warsch it bei mir und i hätt di so braucht
Hosch mi it bemerkt, du warsch untergetaucht

Beim Brunna dia Scherba hon i scho mol gseah
I bi bei deam Brunna im Sommer mol gwea
Komm, hilf mir, mir format aus Ton uns an Kruag
Dr Brunna isch tiaf und hot Wasser g'nuag


Verstand

Im nächsta Umkrois grinsat dr Dod
Am Äpfelbom krabblat Wanza ganz rot
Im Stadl dô hangat a Strick an der Wand
A Jeder isch z'frieda mit seim bizzle Verstand

Dr Tisch in dr Kucha isch unta ganz schwarz
Aus aschtige Tanna quillt klebriges Harz
I hock auf'm Bänkle vor'm Haus an der Wand
Und bi ganz z'frieda mit meinem Verstand

In fiabriger Eile wird gschaffat und butzt
Dr Fleck siaht mr trotzdem, s'hot alles nix g'nutzt
Und koinr ka saga, er stôht blos am Rand
Es sait jo au koinr, er hätt koin Verstand

Im nächsta Umkrois grinsat dr Dod
Dia Oma am Kuchatisch brockat a Brot
In lauwarme Suppa, an Bua bei dr Hand
Bei deam isch mr sicher, der hot koin Vrstand


Zeig mir den Ort

Zeig mir den Ort, wo die Sonn aufgeht
Des Haus, wo dô unta in New Orleans steht
Dr Strôßasänger auf der Galerie
Der luaget auf'd Leit nab, dann singt er für sie:
 
Zeig mir den Ort, wo na soll I geh'n
I ka diese Welt plötzlich nimme versteh'n
I bi völlig gelähmt, I wois it was dua
I sieh des Gesicht vor mir immerzua
 
Zeig mir den Ort voll Friede und Glück
Was gwea isch, isch gwea, es gibt koi zurück
Dia Sonne verbrennt mi erbarmungslos
Es isch alles offa, I bi heimatlos
 
Zeig mir den Ort, mach auf das Tor
A Lawine reißt mi mit, so kommt's mr vor
Mei Herz, sei doch still, was hämmersch so wild
Als hättesch no nia Dein Hunger gestillt
 
Zeig mir den Ort, verschiab mit mir dr Stoi
I will mit Dir baua, I schaff's it alloi
Dr Dag gôht unter im Dämmerlicht
Dr Morga kommt voller Zuversicht


Wenn dr Stock umfällt

Wenn dr Stock umfällt seid ihr alle tot
Wenn dr Esel schreit siaht mr s'Morgarot
Wenn dr Jäger kommt druckt dr Wildrer ab
Wenn die Arche treibt soichts vo oba rab

Wenn dr Boda knarrt pfeift dr Tod im Gang
Wo mei Mutter schlôft scho ihr Leaba lang
Wenn die Haustür klemmt mach i d'Auga zua
Koinr ka mi seah, i will bloß mei Ruah

Wenn dr Mond it scheint wois mr it wo na
Koiner woiß dr Weag weil koinr leuchta ka
Wenn I zu Dir komm nimmsch mi in dr Arm
Komm vo draußa rei, bei Dir isch es warm

Oinr gôht nôch links, am Kreuzweg gradeaus
Dr Esel isch it dumm, s'isch so viel Platz im Haus
Dr Paparazzi schiaßt ausm Hinterhalt
Wenn mei Katz it schnurrt isch dr Ofa kalt

Was i vor mir seh' ,des hon i gebaut
I bi unsichtbar bis dr Morga graut
Alles Leaba stirbt, alles kommt au z'rück
Lôß mi it alloi auf deam letzta Stück

Wenn dr Stock umfällt seid ihr alle tot
Dr Soldat am Rand bettelt um a Brot
Wenn dr Stock umfällt geht die Kerze aus
Nimm mi bei dr Hand, i gang hinta raus